Álvaro Díaz de Esquível eta Ana Díaz de Salinas

Álvaro Díaz de Esquível eta Ana Díaz de Salinas

Nitxo formako horma-hilobi bat da, Álvaro Díaz de Esquivel eta Ana Díaz de Salinas senar-emazteen irudi etzanak dituena. XVI. mendearen lehen herenaren barruan egina dela uste da, eta Lehen Errenazimentuko estiloari jarraitzen dio. Hiru atal ditu. Lehenengoan, senar-emazteen familien armarriak daude, Esquivelenak ezkerraldean eta Díaz de Salinasenak eskuinaldean, girlandek inguratuak. Bigarrenean, landare-motiboekin eta candelieri eran apaindutako horma-hobi batek aterpetuta, senar-emazteen irudi etzanak daude. Álvaro Díaz de Esquivel eta haren emazte Ana Díaz de Salinas hilobi-ohean dautza, buruak kuxinetan jarrita eta gorputzak plano inklinatu batean kokatuta, atzean dagoena ikustea errazteko. Garaiko modan jantzita eta jarrera lasaian irudikatuta daude biak, patxadan atseden hartzen eta otoitz egiteko posturan, senarra brebiario batekin eskuan eta emaztea eskuak elkartuta. Goialdean, erremate gisa, maskor itxurako tinpano bat eta senar-emazteen arma-ikurrak ditugu. Egikerari dagokionez, antzekotasunak ditu Burgosko Lehen Errenazimentuko ereduekin.